作家龍應台在《目送》寫道：「所謂父母、子女一場，只不過意味著，你和他的緣分就是今生今世，不斷地在目送他的背影漸行漸遠。」上月中，24歲註冊社工梁曉暘因東北案非法集結罪成，被判入獄13個月，梁媽媽目送兒子被押走。此後她每天在窗邊紮一束黃絲帶，祈禱兒子能保守初心，亦盼望社會了解年輕人的躁動，不要把他們逼上絕路。

記者　潘柏林

梁媽媽讀過很多遍《目送》，每次都為母子分離流淚，但從未想過兒子因坐監而離開家庭。上月15日梁曉暘判囚，梁媽媽在窗簾繩繫上第一條黃絲帶，絲帶至今綁了20多條，但離出獄日子還很遠，「只係大半個月，但好似過咗好耐，我唔知點解有呢種心情。」家裡窗框亦綁了無數絲帶，那是三年前雨傘運動時，梁媽媽為守望兒子和教會的女孩綁上的。

兒子入獄後，梁媽媽寫了六封信寄到獄中。她每天早上在窗前為兒子祈禱，入夜就點上燭光，「祈禱未必有足夠言詞去表達，燭光可以留低落嚟，就好似一啲心聲未曾能夠盡訴時候，你留下燭光，嗰種守望係一種延續。」

曉暘生於小康之家，一家三口都是基督徒。梁媽媽自言家教嚴厲，要求兒子上大學才可以拍拖、保持貞潔和專一。家人偶爾參與六四燭光集會、七一遊行，但未想過兒子走到社運前線。曉暘卻曾經說過，是受社工系、教會團契和父母影響走上社運路。東北撥款通過前一晚，曉暘回家問媽媽：「如果我畀人拉咗，你會唔會保釋我啊？」梁媽媽答當然會，又提點他凡事有後果，要避免與警察衝突。

翌日示威者嘗試衝入立法會大樓，梁媽媽看電視新聞見到兒子被捕，「我隱約見到警察捉住一個人，雖然佢反轉咗，母親直覺就覺得嗰個係我個仔。」

梁媽媽說，如果自己是一般市民，只看電視畫面亦會覺得示威者暴力，但因兒子身在其中，她上網了解東北事件前因後果，了解示威者為何不滿立法會強行通過撥款。但法庭上檢控官形容示威者行為近似暴動，她有點覺得當局想殺雞儆猴，「其實呢隻雞唔需要一定死嘅。不過有人覺得馬騮喺到搞搞震，殺咗隻雞，馬騮咪驚囉。」

梁媽媽不懂判斷刑期是否過重，但她記得原審裁判官溫紹明說過，希望東北案13人用更聰明方式實踐理想。她同意溫官說法，亦想社會明白年輕人的躁動，「年輕人都會問，仲有啲咩可以做？佢哋希望有果效，唔係所謂行禮如儀，做完之後（食）糖水囉、打邊爐囉。其實希望社會有改變，佢哋衝擊背後希望社會變得更加美善、更加公義，呢個係佢哋想要嘅嘢。唔係衝擊係佢哋最終目的，犧牲係佢哋最終目的。」

她擔心社會沒有溝通，將年輕人逼上梁山，「如果社會冇再有任何改變，仍然覺得我話事，你冇得say，而家係我判定你係點嘅時候，其實躁動年輕人只有越走越激。我唔想見到咁，我亦唔想見到我個仔逼上一條絕路。即使係行公義，我都唔想我個仔犧牲，點解一定要流血？甚至好似《十年》嗰套戲講要有人自焚，我唔想見到，我唔希望社會變成咁。」

梁媽媽希望兒子好好沉澱和回顧東北事件，寄語他「要保守你的心，勝於保守一切」。她相信兒子有他要走的路，「係血緣裡面我係佢媽媽，但係我信仰裡面，我只係代上主讓呢個孩子喺我家庭湊大，但呢個生命路係要佢自己走，或者我可以對佢無信心，但起碼對造佢嗰位生命，將佢放落我個肚嗰位有信心，呢個就係盼望。」