29歲嘅咪神徐淑敏（Suki），雖然已轉行從商，不過佢同無綫原來仲有約喺身。最近無綫對壹傳媒無理封殺，連累上星期四Suki為其創立嘅品牌SEVE護膚品舉行一周年慶祝活動見報率大跌，而 據知無綫曾要求Suki唔好邀請壹傳媒到場採訪，令Suki左右為難。

有見及此，Suki為咗盤生意，佢痛定思痛決意同無綫提前解除經理人合約。據悉雙方仲有四年約，記者今日致電Suki，佢有啲為難話：「都仲係嘅（無綫藝人）。」不過佢承認傾緊解約事宜，但否認封殺事件係導火線，佢話：「唔係，我講咗要求後先發生呢件事，依家處理中，老公都好支持，主要係想做番自己business，覺得可以方便啲，我又唔係話特別有興趣做幕前。」

不過問Suki係咪介意壹傳媒冇採訪？佢直認： 「係呀，好揼心，上個禮拜搞一周年，請日本名模藤井Lena嚟好貴，依家無奈o架，從商業角度梗係想多啲報道啦，唉，唔知點講。」

問解約金額會唔會係天文數字？Suki話：「我哋好和平咁處理緊，其實佢哋有工作搵我，例如做節目嘉賓我都OK，就算之後解咗約，我都唔會去其他電視台，佢哋幫咗我咁多，我目的唔係要去其他電視台發展， 只係想做個商人 。」