繼去年成功捧紅姜濤後，ViuTV再次打造《全民造星II》今日啟動，三十位參賽者齊集九龍灣公開面試，並即場進行現場招募，大會透露至今收到過千人報名，姜B地位開始受到威脅。

組合《MIRROR》今日現身會場做星級評判及嘉賓，大量粉絲空群而出，早已逼在商場等見偶像，《MIRROR》獻唱組合歌曲《前傳》及《破鏡》搞氣氛。隊長Lokman給予新一批參賽者意見：「信心好重要，做好準備功夫，無論表演同說話，表演自信越大，評判對你印象越深。」

今年星級導師會由劉美君、郭偉亮（Eric Kowk）、火火三位擔任，三位上台分享時，劉美君被稱對學員眼淚放題，她說：「今年會忍住唔喊，濕都唔濕，冇面部表情。」Eric則表示非常care學員感受，劉美君聞言即指：「我就係care too much，今年會唔care。」火火即取笑Eric：「佢好唔得閒要拯救宇宙，希望搵到好參賽者，打走佢哋換入MIRROR，咁就最好玩。」

今日參賽者大部份都以歌舞上陣，但唱功麻麻，火火對參賽者要求嚴格。率先接受公開面試參賽者吳啟洋表演跳電子母及清唱陳奕迅《天下無雙》，外觀和演出尚算平均，但當他演出跳舞後氣來氣喘，被火火輕視：「你呢個狀態仲唱到話你好嘢！」看過表演後後，火火譏諷：「 睇完覺得你好有機會入圍，證明你有睇我哋上集節目，因為你走音，不過你有胸肌，希望你有距離可以補救。」

另一參賽者張子衡報稱20歲學生，同樣表演唱歌跳舞，他清唱幾句《海濶天空》後，卻被火火狠批唱歌目無表情， 而MIRROR成員Jer都叫張子衡可以更投入，火火即時叫Jer示範，誰知Jer唱頭幾句似模似樣，高音時即走音兩次，令現場所有人發笑。劉美君亦批評參賽者：「唱歌時頸以上完全唔郁，又成日轉KEY，我唔知你有音樂係咪會跟到，但勸你避免唱歌。」

另一參賽者嚴政為網紅，樣子女性化，被MIRROR成員Anson Lo指SELL可愛，火火則說：「 睇你個樣好女仔，好適合着女僕裝。」嚴政表示：「有需要可以試。」

劉美君否認為嚴格導師，她說：「上年分組時個個話跟Eric係國際學校，我呢邊係傳統學校，決定今年改一改個形式，導師吓吓安排畀學員佢哋好難成長，今年我會攞個平衡，教佢哋爭取，舊年係我去捉佢哋，今年主動問我嘅我就會幫，自己唔使咁勞心，不過細節仍然未知道。」

去年造星三甲姜濤、陳卓賢（Ian）和楊樂文（Lokman）面對新一批造星各感壓力，姜濤說：「不斷有新人加入係好嘅壓力良性競爭都逼自己進步。」當第一位參賽者面試時，姜濤粉絲即歡呼大叫，姜濤傻笑說：「係咩？咁我要加油。」Ian說：「 壓力之餘都興奮期待，希望落場切磋互相學習。」

造星監製花姐透露節目會有新元素及新獎項， 由三位導師劉美君、火火、Eric Kwok集中面對99位學員，之後分組演出，會較上輯着重個人表演，6月會開始比賽，節目9月出街，12月造星II冠軍會誕生。至於去年現金獎一百萬極為吸引，花姐有所保留：「同上年唔同，總之冠軍會有獎勵，模式唔同咗，我哋係一個真人騷，想有神秘感，同時亦都想知道獎金獎品嘅改變對參賽者心態有冇影響。」

參賽者中有曲赤、影壇新人劉頌鵬及王祖藍表弟李俊華（孖八），曲赤表演歌舞及rap歌，新意欠奉。而劉頌鵬自我介紹為演員，上台後因站立左右不定，即被花姐嚴斥，之後即企定定對話，被花姐追問是否受女性歡迎，他竟說：「男仔會多啲。」跳舞環節竟使出健康舞舞姿，蝦碌搞笑，充滿娛樂性。

孖八自稱一位街舞者，表演自彈自唱《今生今世》被批造作和老態，再清唱祖藍《跌落凡間的天使》後花姐指容忍有限度。孖八稱曾參加過亞視星光大道及參演電影《狂舞派》，去年因被邀到內地參與節目《熱血街舞團》而錯失參加造星機會。之後大家期待孖八舞姿，看過舞蹈演出後，花姐竟表示：「我真心鍾意佢呀！」

此外，即場招募反應熱烈，只要年滿18歲及有香港身份証即可參加，有近五十人報名入場面試，不過質素完全毫無篩選，立見參差，準備亦欠充足，部份更似諧星選角。當中有凸腩大叔、頭髮凌亂金毛男、矮小哨牙男等。

《MCU寶石時軸全記錄》
1套6冊解構Marvel電影宇宙
入場睇Endgame前必讀天書！
https://hk.adai.ly/IFk7iee55V
-----------------------------
【記住63836568】全民爆相爆片！下一個爆料王就係你
https://bit.ly/2Guolu9
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI