本月30日係大名娛樂揸弗人林建名（大少）79歲牛一，由於長輩習慣咗計虛齡，所以今年大少隆重慶祝80大壽，噚晚佢先喺廣州搞生日會，下周五（26日）就巡迴到香港嘅灣仔會展，筵開80圍廣邀親朋好友齊歡暢同慶賀。

噚晚大少率先喺廣州某酒店舉行生日派對，主題係中國風，大名旗下藝人拉隊上廣州賀老闆，契女戴夢夢同胡渭康擔任司儀，得寵嘅何傲兒就上台唱歌助慶，着大紅圖案短旗袍嘅傲兒，盡騷迷人葫蘆曲線同長腿，佢接受電話訪問表示：「今年好高興，因為林生80大壽，全部同事都隆重其事，其實我哋每年都喺廣州、香港開派對，今年主題係中國風。」

傲兒話噚晚喺廣州一間酒店舉行，大家都要着中國衫：「我唱《情義兩心堅》送畀老闆，因為佢對身邊人有情有義，希望佢長命過百，身體健康，自己都跳咗少少中國舞，夢夢同胡渭康做MC、仲有陳錦鴻、廣州藝人出席，好熱鬧，林生好開心。」問傲兒有冇送禮物？佢話：「冇呀，唱歌囉，佢屋企人全部嚟慶祝，蛋糕又好靚，好似八仙賀壽，場面溫馨感人。」有冇見到林生嘅女朋友？傲兒醒目避答：「邊個先？唔知邊個喎，問番老闆。」

而夢夢就喺電話表示：「噚晚擺咗26圍，好開心好溫馨，林生請咗廣州政界、商界朋友出席，大家都玩得好開心，佢着咗一套長衫好似皇上，心口好大塊玉，寓意年年有餘，佢好開心仲親自敬酒，大女（煒珊）、女婿、孝信、三女（煒珽）全部都有嚟。」