立法會幾個委員會今日討論前往考察長江三角洲地區主要城市，根據立法會初步安排，議員到訪杭州時將參觀「國家蛋白質科學中心」、「上海天馬生活垃圾焚燒發電廠」，並會品茗考察茶文化等。但議員明顯嫌初步嘅考察安排「唔夠喉」，一人一句「落單」話想去唔同地方考察。

立法會經濟發展、工商、財經，資訊科技及廣播事務4個委員會討論今次返內地嘅行程，工聯會陸頌雄話要去睇西湖，因為當地嘅「水資源」保育做得好，金融服務界議員張華峰就話希望可以抽時間參觀上海交易所，民建聯漁農界議員何俊賢好特別，話當地每年都有大批大閘蟹供港，所以想去西湖同陽澄湖了解大閘蟹產業，仲話希望邀請埋食衞局局長陳肇始一齊去睇蟹。

民主派方面，表明未決定係咪參加考察團嘅公民黨「飛機師」譚文豪就話，如果立法會到訪上海，應該睇埋中國嘅飛機生產商。白鴿黨黃碧雲就話，希望可以參觀上海中醫藥大學，因為該處有研發中醫藥嘅專家。資訊科技界莫乃光就話，希望可以去當地高等院校參觀，了解當地研發同人才培訓工作。

向來搞笑嘅「元秋」蔣麗芸建議，不如去睇吓當地公眾街巿、小學同幼稚園，令今次主持會議嘅自由黨鍾國斌都忍唔住話：「咁我哋可能要去一個禮拜先得喎！」，佢話會向政府反映，睇吓係咪可以滿足議員嘅要求。

民主派會議召集人「Miss Mo」毛孟靜就話，民主派大約會有6至8個人參加此團，民主黨、公民黨、專業議政都會有代表參加，至於議會陣線就唔會有議員赴約。Miss Mo話，個人覺得呢類官方編排嘅行程，真係唔係太需要參加，又半講笑咁話，此行第一站係上海（Shanghai），「我哋唔想畀人賣豬仔，用英文講就係：We don’t want to be shanghaied」。

10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI