前季冠軍騎師潘頓，剛周三谷草夜馬交白卷，不過這天跑番沙田日馬，佢馬上重現強勢，下半場發力先勝第六場大熱葉廐「琪麟穎」，到第八場三班1000米直路賽，更以在港初出馬、蘇偉賢馬房之不明物體「世澤之星」建功起孖，為自己於初三賀歲賽起停賽三期補數。
「世澤之星」現年四歲來自澳洲，這天票數硬淨，早段守中後位置好整以暇，拉士一發力，即貼住外欄長驅直進，潘頓收韁輕勝，完全當跑第二的新勝惡馬2.4倍大熱「嘉福」冇到。「世澤之星」實力睇嚟極唔簡單，呢條4.5倍大熱Q亦順利開出；而「世澤之星」單Win及組合獨贏A1，分別派32及14元正，蘇偉賢亦告連勝四期日行一善，於羊年留下開心回憶。
今場三、四名順序由「忠心義氣」及「野孩子」後上取得，後駒騎師專程來港客串一日的白布朗，繼第五場以「家品大王」跑第三後，呢場跑第四又有獎金落袋，四重彩派8,330元。