MerryChristmas！噚晚踢完多場賽事，今日可供投注嘅得4場，各位波友(包括我自己)終於可以唞唞。而我哋一班每逢周末晚都六親不認、淨係掛住鑽研賠率同投注嘅同事，今晚亦可暫時將工作拋開。

大簡得獎或成壓力

逢年尾唔同界別通常都會有頒獎禮，呢排球壇最紅嘅梗係新出爐嘅世界足球先生簡拿華路（大簡）啦！佢喺世界盃同聯賽嘅表現最穩打穩紮。上場2006煞科戰皇馬對維爾瓦，個個都金睛火眼睇住呢位得獎人兄踢成點，但佢嗰日嘅表現喺水準之下，皇馬失球都係怪佢走失位。唔知係咪壓力下失準；趁住歇冬relax吓，下年繼續努力啦！
西方國家梗比我哋中國人更重視聖誕節，所以歐洲各地聯賽嘅球員(英超除外)，有假期一定「及時行樂」。做職業球員，平時唔係練波就係比賽，生活應該都幾dry吓！但有時睇新聞，間唔中都有一、兩宗報道球員玩到過咗火位，醉酒鬧事，又或者有桃色新聞俾人偷影「斷正」，睇嚟各位仁兄都要檢點，唔好「樂極忘形」呀！
WENDY
由歐國盃EuroBabes，變身球彩台受歡迎主持。