【新增內容及圖片】
《MAMA》大軍今日陸續抵港，到下午4時，繼續有韓星陸續抵港，包括美魔女金成鈴、韓劇《又，吳海英》女星徐玄振、男星黃政民，當大部份韓星都戴住黑超或口罩遮樣時，徐玄振就大方咩都唔遮，仲親民不停向粉絲揮手，其同行嘅工作人員亦代為收花。

約於4時20分，GOT7嘅香港成員Jackson（王嘉爾）獨自抵港，Jackson亦似乎好攰咁，滿面鬚根，但佢都有向粉絲鞠躬及揮手。約於5時15分，男星李鎮旭、車勝元、裴正男、韓片《與神同行》男星李浚赫亦先後抵港，眾人都親民地向粉絲打招呼，韓劇《我的黃金光輝人生》女星徐恩秀於半小時後接步出接機大堂。

韓國選秀節目《PRODUCE 48》出道嘅限定女團IZ*ONE亦於今日傍晚6點抵港，粉絲立即以尖叫聲歡迎，係全日下午抵港嘅韓星中收獲最多歡呼聲嘅一隊，更有粉絲穿上兔仔裝到機場博偶像見到。組合由成員張元英帶頭現身，分三架車離開，不過成員安宥真一度唔知自己應該坐邊架車已徬徨地周圍望。

到晚上7時20分，TWICE餘下嘅成員彩瑛完成韓國工作後，立即來港會合隊友，飛嚟飛去認真頻撲，不過佢仍然甜笑揮手向粉絲打招呼。

而擔任嘉賓嘅已故流行天王米高積遜（ Michael Jackson）胞妹珍納積遜（Janet Jackson），亦於晚上7時55分喺工作人員陪同下步出VIP接機大堂，穿上黑色羽絨嘅佢急步上車，不過佢就有拉低車窗向傳媒揮手示意，好不親民。

精選韓流，喺晒《娛果》
http://fb.com/appledailyent