由影星曉治積曼（Hugh Jackman）、碩克艾佛朗（Zac Efron）、辛蒂亞（Zendaya）及Keala Settle等主演嘅歌舞片《大娛樂家》（The Greatest Showman）叫好又叫座，上映3日本港票房已超過270萬。早前本報特約記者亦獨家專訪幾位主角及導演米高格基斯（Michael Gracey），而曉治積曼更自爆年紀大膝頭退化，面對大型歌舞戲份都係頂硬上，認真專業。

《大娛樂家》係一部大型歌舞片，戲中人人都又唱又跳，鏡頭背後卻需要無數排練，曉治積曼就話：「每天拍10-12個小時，籌備則約4年時間，初時只有四首歌，之後有6首，加上找一些百老匯演員一起學習舞蹈，開拍前我們預習了10個星期，每一日都練習，特別我和Zac在酒吧內那一場舞蹈片段，打爛了無數酒杯呢！」佢又話到自己年紀大，再要跳舞確實吃力：「我已49歲了，我的膝蓋開始退化，那些舞蹈安排對我說有點挑戰性，還有唱《Free》這首歌，十分之高音。」戲中佢飾演嘅P.T. Barnum身世傳奇，不過喺佢心目中，現代都有唔少「大娛樂家」：「Colin Hay, Men At Work的主音歌手，Justin Timberlake、Beyonce、Richard Marks和Sting都是我心目中的Greatest Showman。」

另外導演Michael Gracey係首次執導電影作品，仲經曉治積曼介紹下，搵到為《星聲夢裡人》（La La Land）作曲嘅Benj Pasek同Justin Paul合作。佢指Benj同Justin寫緊《星聲夢裡人》一片時已開始為《大娛樂家》作曲，當曉治積曼唱《From Now On》呢首歌時，已知道係整部電影嘅靈魂了：「拍這部電影有限多令大家感動的場面，因為各演員們如辛蒂亞和碩克都不是專業的吊架千秋表演者，但他們二人均很努力去學作，不用替身去演出，還有Keala Settle和莉碧嘉費格遜（Rebecca Ferguson）的演唱，均令到大家嘆為觀止。」

特約記者Lilly Lui洛杉磯專訪

更多娛聞，喺晒《娛果》
http://fb.com/appledailyent