王氏港建揸弗人王忠桐，曾經話佢嘅CEO銜頭，其實係ChiefEntertainmentOfficer（首席娛樂官）咁解，即係主要負責玩，佢仲話呢個係佢嘅心願，話晒今年佢都64歲，退休歎世界都係時候，噚日王忠桐呢個夢想差一百萬股就可以實現，即係話佢要繼續捱世界。
王氏港建噚日舉行特別股東大會，為私有化呢個建議表決，其實大股東出手都唔差，有兩成溢價，所以大家都以為一定會通過，點知得23個股東出席，當中有6個投反對票，贊成嘅有18個。
華華八到，其實贊成嘅股東唔只咁少，但弊在大部份小股東唔知係偷懶、事忙，抑或以為實會通過，所以冇出席，最後只差104萬股而未能通過私有化，王忠桐亦因呢百幾萬股而飲恨。

贊成票去咗邊

有份投贊成私有化嘅小股東吳小姐對結果幾唔滿意，話啲人唔嚟，放棄投票權利，累到過唔到！佢呼籲未能親自出席嘅股東，亦應授權某人代為投票，否則私有化失敗後公司股價回落，只會招致自己損失，「呢個係唔嚟嘅教訓！」佢自己對收購價表示滿意，又讚大股東算慷慨，喺私有化之餘，仍繼續派發中期股息每股1.5仙。
比吳小姐更失望嘅梗係王忠桐啦，雖然佢解釋因股價長期偏低，被人忽略，故諗住畀個小股東套現嘅機會……但人人都知佢個仔王賢誌寧願去TVB打工都唔願幫老竇手，咁後繼無人，不如自己遊雲野鶴歎世界算啦。
不過遊戲規則不可不從，今次唔得，咪下次囉，但佢話按例最少要一年後先再考慮，到時睇吓股價表現、交投量同公司生意再定啦。