雖然老闆唔蒲頭,但過萬員工唔敢偷懶,繼續扮鬼扮馬hardsell「勁優質」服務,不過表演內容就馬虎啲。
聽講表演乜嘢係由個別部門自己度掂,但水準參差,好似有一隊唱英文歌竟然咪嘴,有一隊淨係拋吓彩球就當過關。
好彩有8號仔睇嚟最有前景嘅now電視台交足功課,派出嘅人數最多,用嚟表演嘅道具亦最重本同埋揼心製作,用大字廣告牌唔在講,至搞笑係用透明膠箱將中外名人笠上頭,變相叫奧巴馬、希拉莉、畢彼特同任總等,宣傳新聞同電影台,之但係,點解冇最有噱頭嘅二少同Isabella呢?
時勢艱難,但激勵吓員工士氣都應該嘅,8號仔今年就逆勢搞咗個獎勵計劃,成個集團每個月會選出最多10個提供卓越服務嘅精英,每人醒一張金牛,年尾仲會選出精英中嘅精英,獎品就係日本免費旅行,聽落好吸引,可惜名額太少!
李華華
mailto:
[email protected]