巴塞隆拿禮拜三晚喺歐聯次輪分組賽作客葡萄牙鬥士砵亭，巴塞教練華維迪喺賽前講到其他球隊點樣防守美斯嘅時候話：「人盯人？有鬼用咩？」

美斯今季喺西甲同歐聯加埋踢七場入咗11球，狀態可以話係弗到爆。巴塞教練華維迪就話：「講到人盯人守住美斯喇喎，我喺仲帶緊畢爾包果陣試過一次，我以後都唔會再用呢一招。咁當然，每隊波都可以用佢哋覺得合適嘅戰術嘅，我哋咪睇下點應對囉。人盯人又好，區域聯防又好，總之就見招拆招喇！」