吳千語同師弟栢天男今日於會展擔任鐘表品牌嘉賓，並即場演繹短劇。一身鲜紅色裝束嘅千語剛從雲南香格里拉返港，今次係去當地同謝霆鋒拍攝鋒味系列節目，千語表示一直恨拍飲食節目，估唔到有幸跟偶像合作，佢話：「今次未有機會試到霆鋒廚藝，主要係我哋到當地品嚐美食再由霆鋒評價，之後再拍可能有機會自己煮。」

幸好到達海拔三千多米高地冇發生高山反應，相反身邊髮型師就又頭痛又嘔。當地風光如畫，但千語指去過一次就夠，未有計劃同男友林峯去玩，佢話：「陽光與海灘、有山有水靚景我都鍾意去，不過當地有啲遠。」講到跟林峯是否同居試婚階段，佢強調冇試婚，彼此工作忙而甚少見面時間，正如佢下月中又要北上拍劇四個月，所以平均一年見面時間少過五份一，問到會否珍惜在港見面時間而半同居？佢話：「可以咁講。」