感情路上兜兜轉轉嘅章子怡，今日終於幫到佢個歌手男友汪峰登上頭條——噚晚汪峰喺女友三十六歲生日前夕，豪花百萬喺北京為女友舉行驚喜生日派對，仲突然以航拍機送上9卡鑽戒跪地求婚表白：「我們站在了大家的視野裏，我們經歷了幸福和心酸，我希望子怡可以一直擁有最幸福的時光。如果我們都老了，我還能照顧你。」章子怡激動得雙手掩面、當場落淚，在一眾親友見證下說出：「我願意。」

據內地傳媒報道，噚晚一身RalphLauren火紅晚裝現身嘅章子怡，收到嘅係來自英國品牌Moussaieff嘅9.15卡鑽戒，當時汪峰仲單腳跪地表白，戲劇性而煽情。之後兩口子仲相擁欣賞煙花，並逐一接受那英和王力宏等好友祝福。

報道仲話，章子怡喺現場激動得數度落淚，仲話同自己經歷嘅所有痛苦及委屈相比，佢只會記得最美好嘅事。到今早，當微博開始發佈第一條汪峰求婚成功嘅消息後，當然馬上洗版，章子怡亦揀正大家起咗身之後上載一張煙花相，分享喜悅謂：「我願意。」汪峰其後轉載並回應謂：「謝謝你給了我完整的生命，所有的艱辛都已是往事，從此我們攜手到老！」

汪峰工作室受訪時表示，佢哋只係幫手籌備生日派對，對汪峰求婚毫不知情。