當年今日

「韓國宮崎駿」李成彊力作《美麗密語》清新上場

蘋果日報 2002/09/29 06:00


曾獲安錫動畫節最佳動畫
《美麗密語》剛在暑假上映,落畫個零月就已經推出3區DVD。製作此片的導演李成彊大有來頭,自95年起製作了13齣動畫,共獲得了11個動畫獎項,這套《美麗密語》更得到2002年法國安(Annecy)動畫節最佳動畫,被人稱為「韓國宮崎駿」。
《美麗密語》大部份動畫製作都是交由《Flash》及《Illustrator》一類普通電腦繪圖軟件完成,場景有如一幅幅用水彩淡掃的插畫,人物以精簡的線條來表達,睇慣了美國的電腦動畫和日本標榜細膩的手繪畫,再睇番現在的《美麗密語》,感覺特別清新。
《蠍子王傳奇──盜墓迷城外傳》快過美國本土有貨
根據美國官方網站資料,《蠍子王傳奇──盜墓迷城外傳》DVD碟應該要10月1日先至公開發售,唔知點解香港碟場今個禮拜竟然有1區新碟返。故事講述五千年前的古埃及,蛾摩拉城暴君要清除流散於沙漠的遊牧民族,用魔法殺害平民,最後各部落聯合反擊,聘請專業鬥士馬提亞斯(丹歷莊遜飾)來消滅這個幕後下咒的女魔法師。基本故事內容同戲院版冇乜分別,一樣係92分鐘;Bouns片段都係大路嘅製作特輯,唯一可取係多咗段《IStandAlone》MTV,算係有所交代。
《宇宙無限》16:9闊銀幕解讀宇宙
由BBC出品嘅《宇宙無限》(SPACE),曾經喺英文台播過,以大量電腦動畫解釋宇宙點樣由「大爆炸」產生、探索宇宙可有其他生物存在、黑洞的形成及威力等,簡直係一本活動天文學教材。今次以孖碟裝推出,片長190分鐘,16:9的闊銀幕比例,聲畫表現俱一流,中文字幕重細分為香港、台灣同簡體三種,天文術語繙譯得好專業,最緊要係價錢平,呢類影片多數要幾百蚊,𠵱家百零蚊買到,好抵!
必睇Bonus
Disc2的「宇宙小常識」,會用文字講解有趣天文小知識,「相片集」還收錄了片內的靚靚CG宇宙圖片,值得一看。
本周最新DVD碟報
售賣點:
DVSHOP(21949100)
深水埗福榮街107號舖