因呢兩日颱風山竹吹襲香港，搞到周圍出現塌樹、雜物四散、棚架倒塌、水浸及路面有障礙物，好多路都封咗。政府冇宣佈停工，好多打工仔仍然要上班，今日有讀者喺上午約11點，喺元朗錦綉花園附近馬路，見到33歲嘅林德信揸住部舊款平治旅行車入去屋苑，但突然停低咗，之後見佢落車睇啲車軚，原來架車左邊前軚爆咗，可能因為打完風，成條路好多障礙物，唔不小心就整爆車軚。

讀者話見林德信係咁搵人幫手，但當時個個都趕住返工，所以冇人肯停低架車幫佢換軚，結果佢將部車勉強開到附近一個油站，然後請油站職員幫手一齊換軚，佢先可以開番架車走。林德信雖然係歌手，但佢近年都好極教人瑜伽，因佢喺入行前已考到專業瑜伽導師牌照，圈中有唔少明星跟佢學，而佢女朋友都係熱愛玩瑜伽嘅Candace Poon。

《蘋果》聯絡林德信了解，佢透過經理人公司回覆：「爆軚好小事，冇特別回應。」

精選娛聞，喺晒《娛果》
http://fb.com/appledailyent