《逃犯條例》修訂令到立法會風起雲湧，大家亦唔好忘記，政府同時喺立法會硬推緊《國歌條例草案》。由紅二代霍啟剛出任執行主席嘅香港各界青少年活動委員會，真係政府嘅好幫手，近日整咗套《義勇軍進行曲》快閃音樂短片，明顯係為政府造勢宣傳，不過呢條片反而為民主派提證據，證明佢哋批評《國歌條例草案》荒謬之處係有可能出現。

張超雄︰條文帶歧視成份

呢條片有好多知名「紅」人參加，包括講過自己如果要買電視機一定會買日本製、因為「中國的會爆炸」嘅成龍，同埋曾經支持成龍做政協嘅譚詠麟，其他如鄺美雲等人大代表，當然都要現身唱國歌，齊齊向阿爺展示一片丹心，蘭桂坊之父盛智文用中文唱幾句。更搶鏡嘅，可能係片中一位輪椅婆婆，因為當佢聽到國歌時，都要突然撐枴杖，彈起身肅立。原來連行唔到嘅殘疾人士聽到國歌，都要立即撐住枴杖企起身，係咪暗示唔企就犯法？

其實一向關心殘疾人士權益嘅工黨議員張超雄早前講過，《國歌法》條文中要求出席奏唱國歌場合人士要「肅立」不合理，因有啲人可能因身體情況無法「肅立」，認為條文帶有歧視成份。政制及內地事務局局長聶德權曾稱，「肅立」內容只係指引性條文，如果有啲人因為某啲身體狀況做唔到，唔會因此懲罰有關人士，不過呢條紅色宣傳片畀人感覺就完全唔係咁，好似同市民講坐輪椅聽到國歌唔肅立就犯規，唔知政府覺得呢條宣傳片，到底係「幫到忙」抑或「幫倒忙」呢？

李八方