立法會前主席、民建聯曾鈺成，經常喺報章專欄以茶客對答方式點評時事，上周特首林鄭月娥喺答問大會爆出將調高長者綜援年齡攝入預算案、議員支持預算案等於支持呢個政策，結果一次過辣㷫民主同建制派議員。曾鈺成噚日又用茶客對答方式，同娥特、勞福局長羅致光上政治課，話政府成日叫政黨睇大局，但對政黨嚟，選舉先係大局，暗寸娥特等同為民主派提供彈藥打建制。

以美國行政立法鬥法比喻

曾鈺成噚日喺《am730》專欄借茶客論政，先由疑似撐娥特茶客出聲，話娥特真厲害，議員要佢撤回方案，佢就話政策早放入預算案，係由議員批准，議員仲有乜好講？輪到疑似撐建制茶客出場，話娥特若然熟書，應知道包括建制派在內對呢個政策都反對，𠵱家擺議員上枱，話佢哋其實已批准，議員怎能不反彈？且建制派嘅政治立場，點可以為一項措施對預算案投反對票？

不過疑似撐娥特茶客即時話建制派被屈屬咎由自取、冇骨氣，鬼叫建制即使政府少理，一樣乖乖投贊成票！另一茶客仲叫建制派不應意氣用事，要講大局，唔好同反對派合作，點知疑似代表曾鈺成想法嘅茶客立即反駁，今年係選舉年，選舉就係大局。政府畀反對派彈藥，同選民講，建制派支持政府削減長者福利，試問又點可以唔叫政府撤回？不過娥特表明冇得傾，有茶客話香港遲早好似美國，行政立法拎預算案鬥法搞到停擺，不過八方就唔擔心，建制咁顧全娥特大局，點會搞預算案？