歌曲《我失戀你悲傷》原唱者洪楗華，早排重現幕前。佢日前帶埋囡囡喺觀塘接受訪問，當年未成年，17歲就簽約寶麗金，眨吓眼，就20年，𠵱家人到中年，40歲嘅洪楗華，除咗肥咗，個樣同以前分別唔大。講起入行經歷，佢係已故歌唱老師戴思聰嘅徒弟，94年憑《我失戀你悲傷》一曲熱爆K場，不過97年同上華唱片完約後冇耐就淡出娛樂圈，轉行做生意，仲同青梅竹馬女朋友結婚，有兩個小朋友。

做生意養家

早前佢應薛家燕邀請再度亮相幕前，唱live仲保持到水準，洪楗華話：「嗰晚唱完之後，勾起好多回憶。我係一個有表演慾嘅人，好願意唱。但要當職業維生唔容易，如果唔做生意，唔知點維持家庭。」唔再揸咪之後，佢轉行做生意，代理美國維他命丸，唔多留意娛樂圈，反而會睇YouTube。
至於之前亮相《流行經典50年》，佢自爆推過一次：「嗰陣我係一個200磅嘅肥仔，唔知點見人，後嚟想唱歌畀大家聽，所以決心減肥，三個月減咗30磅。」回想當年，佢覺得好快就消失人前，歸根究柢，除咗只係鍾意唱歌，唔夠多元化之外，仲同外形有關：「自己個樣好似好花弗，又少爺仔，𠵱家做咗爹哋，如果我個女嘅男友，好似我十幾歲嗰陣，我都唔鍾意！」
場地提供：CAY PARTYROOM