你地平時用開咩聽歌app呢？話說越野兔幾年前已經開始用Spotify聽歌，但免費廣告越來越煩，最後終於試下個Premium版啦，唔試由自可，一試好處多，可以download定離線聽慳data，又可以想聽咩就聽咩，仲唔洗聽佢啲煩膠廣告，成件事就好似由食明將，轉食中高檔壽司店，返唔到轉頭。如是者，越野兔每個月心甘情願由得佢喺信用卡過數48蚊喇！

用咗一排Premium，發現原來有個仲抵嘅家庭plan，聯同其他家庭成員一齊用，第二位開始半價。換言之，6個人用一個月都係俾168蚊，除開每人28蚊，抵過自私用好多！最近Spotify又改咗遊戲玩法，78蚊一個月，可以6個人共享，每人每月13蚊就得喇，變相劈價54%！兩串魚蛋嘅價錢就可以想聽乜就聽乜，勁抵！

點解咁好死大平賣呢？睇返Spotify條數，月活躍用戶上個月剛剛突破1億人，其中俾錢嘅訂閱戶數為3,000萬人，完勝上年蘋果公司推出的AppleMusic一倍。不過呢，人多又唔等於賺到錢，公司成立10年以來，由於收入七成以上支付唱片公司及藝人，餘下資金作發展用途，令到公司2015年仍然蝕緊逾2億美元，真係有李嘉誠加持都搞唔掂。

睇返對手AppleMusic，雖然時間上輸在起跑線，但憑手上持有大量iPhone用戶的優勢，家庭plan亦都係78蚊一個月，就可以6個人共享，用戶數目增長快過火箭。所以Spotify最近變陣割價，其實就係想同AppleMusic死過！

事實上，環球音樂串流市場競爭越見激烈；單計本土市場，除了Spotify及AppleMusic外，仲有來自台灣的KKBox、騰訊（700）的JOOX，以及電盈（008）的MOOV等；外來又有GoogleMusic，就連Amazon亦都搞緊串流音樂，江湖上一場腥風血雨已經展開，劈價鬥爭客結果通常係點？我地交少啲月費囉！

從來沒有放棄成為一個偉大歌唱家嘅越野兔
https://www.facebook.com/Sailorrabbit/