當年今日
關於我們

張瑪莉狠批港府抗疫政策堅離地:漏洞多到離晒大譜

蘋果日報 2020/12/15 17:12

張瑪莉政策真係完全唔work漏洞離地

武漢肺炎第4波疫情嚴峻,確診個案的數字持續高企,政府的防疫措施壓制不到傳播速度,各行各業陷於經營困難的局面。1975年香港小姐冠軍張瑪莉昨日在FB開直播,表示在早餐期間看完報紙後,覺得很無奈:「真係張張都鬧緊呀,而家好多社區感染,唔同嘅屋邨都有事,睇到政府話12月22日先開始做酒店隔離,我唔係鍾意鬧人嘅人,但真係有少少豈有此理,其實真係好多國家已經實行,好似澳洲已經實行咗幾個月,我哋啲官仲話慢慢去研究,仲使研究?已經有咁多成功例子,澳門、內地、紐西蘭同澳洲,人哋個個地方都做晒喇,我哋啲漏洞簡直多到係離晒大譜!真係要自己保護好自己。」
張瑪莉炮轟港府唔聽民意堅離地:「其實我都唔係好明,喺11月底同12月初都提過,好唔好暫時停一停,唔好畀啲人返嚟?如果真係返嚟,即刻喺機場接佢哋去檢測14日,盡量唔好再出出入入,但最後梗係冇人聽,我哋人微言輕,慘喇,今年聖誕節冇㗎喇,大家安坐家中啦,喺電視睇落雪又好,火爐又好,食火雞又好,係好冇意思囉。」她還對農曆新年的情況不樂觀:「我估呢個第四波要去到農曆新年,如果啲政策係work嘅話,不過而家睇到啲政策真係完全唔work囉!我覺得我哋政府真係好離地、好離譜,仲使研究?唔使研究喇,咁多成功例子畀我哋睇!我哋政府好驕傲?唔係,講政府唔啱,係裏面有人好驕傲,成日覺得自己個方式好得!老實講,我哋而家唔係第一波,已經第四波喇,試過『清零』,究竟個問題喺邊度呢?如果針對個問題,好似政府請啲醫療專家講,會一路『波』落去!」

點解唔檢控跳舞群組

由於香港疫情嚴峻,張瑪莉坦言好多朋友寧願到大陸,隔離後可以慶祝聖誕,自嘲:「我哋呢班喺香港嗰批,忍唔住問:『政府你搞乜嘢呀?你搞掂未呀?』我哋個個自己搞掂,香港市民真係好乖。」她坦言這段時段唔約人食飯,一個人食早餐,希望可以盡快「清零」,回復正常生活,但結果卻十分失望:「點知原來唔係嘅,個個做好晒,真心講,我識又好、唔識嘅又好,700幾人喺唱歌跳舞群組入面,其實喺網上嘅相都睇到,嗰啲個個唔戴口罩,又超過限聚人數,點解唔檢控佢?我真係唔明!其實唔係只係依賴警察執法,其他紀律部隊或食環署人員都可以幫手,檢控有一定作用,應該唔止罰錢,要有啲懲教作用,老實講好多人都唔志在錢,以為罰一罰錢就冇事,但係而家唔係錢嘅問題,係關乎人命問題。」
最後,張瑪莉寄語大家加油,要靠自己,緊記戴口罩、勤搓手,寸爆港府:「真心講去到呢個位,我就唔靠政府,靠政府就危危乎,唔好搞,不如自己做好佢,聖誕同過冬都盡量減少聚集啦!唔好介意自己一個人食飯,喺呢個疫情係會咁,我都有心理準備,希望政府真係揸緊政策,唔好咁樣,真係太令市民失望,我係其中一個市民,真係有少少失望,我有啲朋友係大大失望,我好彩唔係手停口停,但出面成街吉舖。今次咁多群組感染,反而冇任何警誡性嘅執法,重災區又去返飲食業,嗰啲正式有事嘅又唔去禁,睇見真係好可憐!」
empty
張瑪莉叫大家勤搓手。(FB截圖)
empty
張瑪莉提大家出入要戴口罩。(FB截圖)
empty
張瑪莉怒轟:「我哋政府真係好離地、好離譜!」(FB截圖)
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁