曼聯今個夏天簽入前鋒盧卡古，鋒線威力及衝擊力大增，暫時較上季用伊巴謙莫域有過之而無不及，而且，今次盧卡古揀去曼聯而唔去同樣對佢有興趣嘅車路士，紅魔當然威番鋪。而且，好多人以為盧卡古係因為摩連奴嘅吸引力夠大，不過喺盧卡古今晚英超倒戈愛華頓前，摩佬就解畫話，其實只係紅魔出價高過車仔，非常順理成章。

據當時報導，盧卡古以7,500萬鎊加盟曼聯，連同之後嘅條款，隨時可以升到9,000萬鎊（9.6億港元）。摩連奴話：「我唔認為我喺呢單轉會中有影響力，只係得曼聯肯畀愛華頓要求嘅價錢，而且球會肯滿足盧卡古經理人（拉奧拿）要求嘅周薪同佣金，除咗呢樣之外，我睇唔到有其他原因。」