當年今日
關於我們

武漢肺炎︱石籬邨石榮樓恐強制檢測 居民不知爆疫 自嘲似難民感無辜

蘋果日報 2020/12/20 23:08

武漢肺炎石榮樓強制檢測石籬邨葵涌

上葵涌石籬邨石榮樓再增武漢肺炎初步確診個案,若確診後將累計4個單位受影響,需強制檢測。記者來到石榮樓,發現不少街坊對住處爆疫懵然不知,並指甚少留意公告欄的資訊。街坊亦對政府的防疫措施相當不滿及無言,更有街坊指疫情生活令自己變得「似難民」,認為自己做足防疫措施仍受影響感到相當無辜。
empty
不少石榮樓街坊對住處爆疫懵然不知,對政府的防疫措施相當不滿及無言。更有街坊指疫情生活令自己變得「似難民」,認為自己做足防疫措施仍受影響感到相當無辜。

質疑疫苗安全似白老鼠 :梗係等官員打先

居民蔡先生指,就算不是強制檢測,亦會自行做檢測,「啲朋友聽到你棟樓有事喎,都唔敢約你出去啦」。除減少外出次數外,蔡先生亦特意購買更多保質期更久的食品,直言自己「似難民」:「買雞蛋啊、泡菜嗰啲囉,容易擺呀嘛。」被問及對疫情盡快過去是否樂觀,他坦言:「梗係唔樂觀啦,個政府都唔做嘢嘅。」他舉例指:「即係唔係話歧視大陸啲疫苗,而係話你真係冇啲標準測試,同我講話呢啲疫苗係安全嘅,好似呢我哋做白老鼠咁囉,梗係等啲官員打先啦,搵我做白老鼠喎。」
疫情對生活造成極大影響,蔡先生直言感到「好鬼無辜」,「跳老舞群組都唔關我事嘅,但政府做啲措施又唔係針對佢哋喎,即係佢又唔係話(只是)封嗰啲宴會廳啊」,並指「即係好似佢哋搞到呢啲病毒散播,跟住又限聚我哋呢啲普通市民,咁我哋受罪啦」。
empty
疫情對生活造成極大影響,居民蔡先生(右起)直言感到「好鬼無辜」;蔡小姐則寧願強制檢測,直言「自願性肯定好多人都唔會去驗㗎喇」。

無奈難自救 「個政府都救唔到自己」

另一居民蔡小姐寧願強制檢測,直言「自願性肯定好多人都唔會去驗㗎喇」,更指若推出禁足令亦會支持,只想疫情盡快過。對於有連串感染群組爆發,她直指:「其實應該要自覺啦,所有香港人,做好措施咪無第四、第五波再出現咁囉,同埋都係可能要封關。」
至於居民楊先生對其住處多於4個單位染疫毫不知情,表示「唔知喎,無講喎」,更表示「(資訊流通)梗係(做得)唔好啦」。記者問他在這樣的情況下如何自救,他回應指「救咩啊?嗰政府都救唔到自己啦」,並苦笑言:「點靠自己呀?(所以)咪好無奈囉。」
empty
居民楊先生對其住處多於4個單位染疫毫不知情。記者問他在這樣的情況下如何自救,他回應指「救咩啊?嗰政府都救唔到自己啦」。
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁