邵仲衡（大佬孝）同太太今日大約2點20分左右，抵達位於屯門一個投票站，15分鐘後，佢哋兩個完成投票過程離開。

大佬孝表示好難揀（候選人），因為今年係好重要嘅一次投票，所以大家要認真去睇，佢仲話：「我用咗成晚功夫，又同朋友商量下、了解下。」邊方面係最重要？大佬孝表示：「要引入新諗法、新鮮嘅人入去，其實各行各業都係，更何況係眾人之事。」即係投後生候選人？大佬孝未有正面回答，因為佢唔想影響其他人投票。

對於民建聯周浩鼎同民主黨鄺俊宇惡鬥，大佬孝話：「喺香港做事，做生意都好，建制裡面都有好人，泛民裡面一樣都有唔好嘅人，其實各行各業都有，最緊要係理念，我鍾意學霸，讀書程度、工作經驗，再睇埋理念同口才，有理念都要有適當嘅口才去表達，所以我支持學霸。」

講到前特首董建華投票時指心情沉重，佢就話：「我唔沉重，不知幾輕鬆，呢個係眾人之事，大家去面對，以往做法係議會拉布，當了解咗點解有拉布情況出現，拉布未必一定啱，但有啲地方唔拉又唔得。」

提到「掌心雷」出現，大佬孝好無奈咁話：「唔係幾好，唔好咁容易被人去阻礙你嘅諗法，今時今日犯嘅錯，子子孫孫會去受，何必呢？」對於今晚係咪睇實點票情況？佢話：「好緊張，成班朋友都好緊張，大部份朋友選嘅人都好統一，如果係（當選）就好開心。」

同區參選名單詳見此網頁：
http://bit.ly/2aDHmxj