新特蘭來季降班英冠，上季領軍嘅莫耶斯辭職之後，球會到依家都未搵到接任人選。新特蘭首選目標，蘇超鴨巴甸嘅麥恩尼斯都唔肯接呢份job，怕黑貓班主唔肯放水買人，難重返英超。

據報新特蘭方面願意畀鴨巴甸100萬鎊（約1,000萬港元）賠償金，撬麥恩尼斯過檔，不過麥恩尼斯本人寧願留喺蘇超。雖然新特蘭日前將門將比克福特出售，至少收得2,500萬鎊轉會費，不過據講班主馬田巴恩冇打算將筆錢用返喺收購球員度，咁搞法下季新特蘭莫講話要爭重返英超，喺英冠站唔站得住腳都成問題，鴨巴甸話晒都係上季蘇超亞軍，麥恩尼斯揀留低都唔係錯。新特蘭要另覓人選，下個目標可能係前李斯特城領隊皮雅臣。