如果沒有記錯，布拉格移情別戀，始於交響樂團，懷疑卡夫卡後人變心的大婆，以為自己嫁妝豐厚，個衰佬點都唔敢作反，雖然暗地裏和狐狸精眉來眼去，郎情妾意路人皆見，自信河東獅吼聲震寰宇，藤條一出崑曲傳統劇目《跪池》演不成，歌舞伎還有一齣戲文大同小異的《身替座禪》，不怕他不乖乖就範，垂頭耷耳哀求觀音娘娘畀多次機會。啊哈，欺善怕惡縱使乃人類通病，弊就弊在世事無絕對，被虐DNA因人而異，甲之熊掌乙之砒霜，唔好嗰味嘢勉強冇高潮，況且昨天玩SM欲仙欲死，並不表示今日必定繼續甘之若飴，弱男重振夫綱對象不是你，疾呼「我接受唔到囉」有鬼用，家陣有人關懷過閣下感受咩？戀愛這種遊戲根本危險，輸唔起乾脆梳起唔嫁吖笨。

眼看大勢已去，棄婦心胸再淺窄，也應該知道死纏爛打太難看，天下無不散的筵席，嗱嗱嗱，若干年前那餐轟轟烈烈的小桃園，現在大家不是忘得一乾二淨嗎，鄉黑官各奔前程，好戲源源而來，昔日風光的座上客如今不幸無人問津，關起門來統計日報廣告也不失為一種生活方式。奈何公主病一旦發作冇得救，大婆無論如何不罷休，派個嘍囉去叫陣，台詞兜來兜去三幅被，不外「你咁樣始亂終棄，同個𡃁妹比翼雙飛，係要付出沉重代價㗎吓」，疑似手執利器，隨時剪斷惹禍的是非根。不料負心人驚都未驚過，一面委託媒人到新歡府上呈遞聘禮，議定良辰吉日花轎迎娶，一面叉起條腰質問：「乜嘢叫『沉重代價』？」布拉格之戀，看來不再是生命承受不了的輕。