《歲月神偷》取得柏林影展獎項之後，成為全城話題，一時之間，「獅子山下」精神又試爆發，懷念舊事，乃老去象徵，有啲社會學學者唔係講過，勿將舊一套精神嚟教訓八十後、九十後青年人嘅咩？《歲月神偷》講六十年代補鞋匠養家故事，今日青少年何來會有共鳴呀？
我哋講「口述歷史」，口沫橫飛，廣播M有佢一個五十年代「斗零」的故事：阿媽畀佢兩毫子上街買雞蛋，毫半子兩個，買完之後，一個唔小心，將斗零跌在地上，睇住會碌落坑渠，情急之下，飛撲去執番個斗零，點知顧得東時西又歪，兩隻雞蛋甩咗手，跌落地就碎晒。廣播M揸住個斗零回家，享受一餐阿媽炮製嘅「藤條炆豬肉」，至今記憶猶新。S先生話五十年代，斗零好值錢o架，雖係有錢人家，亦都逐個斗零一毫咁樣儲蓄起來，佢當年跟一位世叔上陸羽茶室，叫一碟窩蛋牛肉飯，要一元七角，牛肉飯就收一元五角，世叔對夥計講，「嚟一碟牛肉飯。」飯到之後，夥計行轉背，世叔就從口袋裏拎出一隻雞蛋，在碟邊一敲，一挾，雞蛋落在牛肉飯上，咪係自製窩蛋牛肉飯囉，S先生問世叔：「點解要咁做？」世叔答：「買一隻蛋唔駛一毫子，喺陸羽加多一隻蛋就要兩毫，明白未？」S先生銘記於心，上一代人之節儉如此。
通貨膨脹之後，我哋視一蚊五毫如無物，莫講斗零一毫，要八十後、九十後咁慳家，慳番啖氣好過，所以《歲月神偷》會係一套五十後拍畀五十後睇，而自我陶醉嘅電影，好難得到「升呢」一輩認同。呢日上到陸羽飲茶，醒起S先生之窩蛋牛肉飯故事，常客蘇先生送來一杯紅酒，當然多謝。蘇先生在陸羽飲茶幾十年，子孫成群，佢位公子蘇啟深醫生就巴閉咯，今年年初獲美國公民及移民服務局頒發「傑出美國人獎」，以表揚呢位香港移民對美國之貢獻。佢有何貢獻呢？蘇醫生32年前畢業於港大後移民美國，現任史丹福大學亞裔肝臟中心執行總監，係預防乙型肝病嘅權威。本欄以前寫過香港有免費測乙型肝炎中心，原來蘇啟深在加州亦提供類似服務，造福亞裔移民，唔怪得可以攞獎。