孫達志馬房嘅「甜蜜蜜」今季兩戰兩勝搶晒鏡，係一匹有實力如日方中嘅靚馬，而拉頭馬嗰陣，就例有靚人出現，所講嘅係前工展小姐亞軍，拍過幾駒電影嘅巨胸模特兒Monna林依錡。
Monna係「甜蜜蜜」馬主潘志遠嘅好好好朋友，據知兩個2011年已經相識，早喺前年4月，已一齊入馬場，當日天氣有啲凍，潘志遠仲即刻除件衫畀Monna披住，非常有風度。對於私事Monna一向低調，但就自爆曾遇人不淑，曾將自己隻狗仔，交畀個唔開心嘅女性朋友，陪佢解悶，點知個friend疏忽照顧惹上官非。
講番賽馬，「甜蜜蜜」上次贏馬唔見潘志遠，但Monna就喺度主持大局，隻馬今期又再出，據知潘志遠因為出外公幹，可能再次無法親身督師，不過唔緊要啦，Monna咁幫得手，有佢睇住潘志遠一定放心。「甜蜜蜜」只跑過三次，仲有好大進步空間，上次贏得唔算太吃力，今仗升班負磅大減，三捷有乜奇呀！