日本型男三浦翔平最近積極健身，早前去夏威夷拍節目時盡情露肉，佢喺Instagram上載當地靚相，雖然有網民認為三浦翔平露胸肌照激似澳洲嘅「大隻」袋鼠Roger，但每張肉照都有十幾萬like，可見佢都有大批女士支持。

三浦翔平主演新劇《奪愛、冬》噚晚開播，題材又係日本社會非常普遍嘅婚外情關係，三浦翔平夥F Cup女星倉科加奈扮演夫妻，故事講三浦翔平同未婚妻本來就快拉埋天窗，點知由大谷亮平飾演嘅倉科舊愛突然出現，水野美紀就演大谷亮平老婆，繼而發展出複雜嘅婚外情四角關係。

三浦翔平喺首集中肉騰騰上陣，同倉科加奈有「含蓄」床上戲，既輕咬耳仔又特寫四隻腳交代過程，不過倉科被嫌似條死魚，演技唔及AV女優，而老牌女星榊原郁惠都有份參演，並飾演三浦劇中母親，榊原更有一幕出手摸準新抱倉科嘅屁股場面，而大谷亮平都有沖涼場面滿足師奶觀眾。