呢兩日啲喜事真係接二連三，首先係蕭正楠噚晚喺《萬千星輝頒獎典禮》攞獎時，突然爆出一句:「多謝我太太黃翠如。」驚爆佢同翠如已經喺今年4、5月去新西蘭旅行時註冊結婚(相關新聞: https://bit.ly/2LkiRTI )。

到今日，又有兩件喜訊，就係一直傳為新加坡富商男友生咗第三胎嘅張栢芝，今日一早透過工作室發聲明承認上個月生咗小王子，仲話小王子已經滿月。而到下午，周勵淇就喺Instagram公佈自己結咗婚，丈夫係大陸藝人傅浤鳴(前名傅程鵬)。

鏡頭一轉，再轉番去蕭太黃翠如身上。噚晚頒獎禮未完就急急揸車返去大埔康樂園新愛巢嘅翠如，今日下午4點15分左右，《蘋果》記者見翠如獨自揸車離開康樂園寓所，駛去荃灣一間車房換車胎，佢放低部車之後，行去隔籬間coffee shop坐低，記者上前恭喜翠如，佢笑笑口咁話：「辛苦晒，多謝。」問翠如其實幾時同蕭正楠搬去康樂園住，蕭太竟然話：「等我同佢商量吓先答。」翠如連答呢個簡單問題都要問過老公先，蕭正楠好有夫威呀！

精選娛聞，喺晒《娛果》
http://fb.com/appledailyent