剛被朗拿度收購嘅西甲球隊華拉度列係近年西甲嘅升降機，近10年間，曾經三升二降，即使留得喺西甲，排名都唔見得係好，佢哋最高都係試過排喺第14名，都稱唔上係中游球隊。不過，呢支有90年歷史嘅球隊都有唔少著名球星效力過，例如馬德里體育會神鋒迪亞高哥斯達、畢爾包嘅老射手阿度里斯同一代皇馬傳奇希亞路。

現年28歲嘅西班牙國腳迪亞高哥斯達，喺2009/10球季踢過華拉度列，呢季係佢人生重要嘅轉捩點，果時因為喺馬體會得唔到重用，哥斯達被賣去華拉度列。不過喺依季，哥斯達踢出爭氣波，喺34場比賽中射入8球，助球隊護級成功，亦吸引馬體會將佢回購，最後喺「床單兵團」大熟大勇，再喺英超車路士打出身價，成為歐洲其中一位最好嘅前鋒。

越老越可愛嘅畢爾包前鋒阿度里斯，曾喺2004/05年踢過華拉度列，果時佢先23歲，喺西乙上陣46場攻入20球，表現不俗。一代皇馬隊長希亞路都踢過呢支西甲球隊，呢名前西班牙教練喺華拉度列出道，踢過兩季，之後憑出色嘅表現轉投皇馬，成為一代傳奇。

而喺華拉度列踢過嘅球星仲有路爾斯加西亞、軒斯等等，睇嚟華拉度列都孕育過唔少好球星，唔知朗拿度接掌球隊後，可唔可以將呢個傳統延續落去呢。

--------------------
荷蘭橙衫軍大舉進駐BFB CHAMPIONS 2.0！荷蘭球星機率 7 倍UP！立即下載 http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports