2018年香港小姐冠軍噚晚經已出爐，由大熱門嘅陳曉華（Hera）奪得，雖然有人就覺得亞軍兼最上鏡小姐嘅鄧卓殷，臨場表現就比佢好，但Captain Nancy 薛家燕就係fb都大讚陳曉華，話Hera係佢心目中嘅冠軍。

點解Captain Nancy會突然喺社交網，公開話Hera係佢心目中嘅冠軍呢，原因係噚日Hera喺問答環節中，被司儀要佢喺大台嘅三位阿姐級人馬中，即鄭裕玲（Do姐）、薛家燕同汪明荃三個參加港姐，佢會選邊個做冠軍？而Hera就話會選家燕姐做冠軍，笑言話驚比佢啲死光射死，亦大讚家燕姐嘅笑容好迷人，仲話就算要佢網上投票，都只會投票俾家燕姐。

Hera大賣口乖咁力捧家燕姐，家燕姐當然要回個禮啦，佢就喺fb度貼文留言話：「雖然我無計劃選美，但謝謝你投 #CaptainNancy 一票! 你也是我心目中的冠軍！」而最抵死嘅就係家燕姐嘅hashtag，佢話：「#我不會用十字步死光攻擊你 #但歡迎你跟我學十字步2.0 哈哈哈 #heyaheyahey」。家燕姐話歡迎Hera跟佢學十字步2.0，相信Captain Nancy同Champion Hera一齊跳十字步，都應該幾有睇頭喎！

精選娛聞，喺晒《娛果》
http://fb.com/appledailyent