【新增內容】
由韓國女神孫藝珍與韓劇《機智牢房生活》男星丁海寅合作嘅JTBC新劇《經常請吃飯的漂亮姐姐》（漂亮姐姐）噚晚終於迎來第16集大結局，香港劇迷亦可於Netflix追看劇集，到底孫藝珍同丁海寅會否大團圓呢。

承接上集，丁海寅同孫藝珍分別三年去咗美國工作，三年後喺孫藝珍胞弟嘅婚禮上相遇，丁海寅見到孫藝珍嘅男友親暱咁摸佢塊面，當二人對望時，孫藝珍就避開丁海寅嘅目光，而丁海寅就喺現場同孫藝珍阿媽尷尬寒暄，同時眼睛一直離不開孫藝珍。

丁海寅返到屋企想起以往同孫藝珍嘅點滴，當中仲有赤裸上身攬住孫藝珍咀，不過丁海寅越想越傷痛。

丁海寅約朋友見面，大家提起孫藝珍，丁海寅嘅朋友篤爆佢因為仲掛住孫藝珍而無法愛上其他女人。丁海寅直認喺美國想最多就係孫藝珍，直言唔希望佢過得幸福。

另一方面，孫藝珍都同朋友談起丁海寅，孫藝珍話要好好守護現在嘅男友，又指自己屋企人都鍾意男友，但同時孫藝珍直認如果那天佢唔夠強硬嘅話，佢唔會捨得離開丁海寅。

丁海寅同孫藝珍終於見面，兩人相處得好尷尬，孫藝珍想同丁海寅變返未交往前關係，但丁海寅話冇可能。及後丁海寅飲醉咗搵孫藝珍，責怪佢要求變返以前嘅關係，又指孫藝珍好壞。轉過頭就到孫藝珍去到丁海寅屋企嘈，兩人不歡而散。

孫藝珍終於辭職，並決定到濟州島同同事一齊開咖啡店，同時亦和現任男友分手。孫藝珍喺濟州島過住平靜生活 ，丁海寅偶然聽到孫藝珍嘅錄音，瘋狂去搵孫藝珍。就喺下雨嘅濟州島，丁海寅終於搵到孫藝珍，之後抱住孫藝珍，兩人再續前緣，喺濟州島過住甜蜜生活，二人嘅大團圓結局亦谷起收視，升至6.787%。

更多韓流，喺晒《娛果》
http://fb.com/appledailyent