前港英時代高官，唔單止辦事能力極高，個個英文重「喇喇聲」，揸起支筆寫嘢亦唔輸蝕。好似九四年退休嘅前衞生福利司黃錢其濂（Libby）咁，曾經喺港大修讀英國文學，英文真係超晒班，咁啱佢又鍾意寫作，佢退休去澳洲悉尼定居後，就試吓爬格仔，結果用咗五年時間，寫咗部叫做《RainbowCity》、中文版叫《虹城》嘅長篇小說，講述香港回歸前後嘅概況。
Libby喺政府做咗成廿幾年嘢，當然都有唔少老友，噚日佢為本書搞咗個新聞發布會，自然有好多前高官嚟捧場，好似張大姐張敏儀、媽打李麗娟同余黎青萍咁。着住紅色旗袍出場嘅Libby同以前都無乜變，身形仲好fit，佢話退休後嘅生活都係湊孫為主，閒時都有喺悉尼電台開吓咪做時事節目主持，都唔係好清閒㗎。
點解本書要寫成五年，都係因為佢力求完美，好似本書裏面有一小節提到冬蟲草呢樣嘢，Libby就即刻睇咗成十二本參考書，研究冬蟲草究竟係乜東東，真係一絲不苟。結果佢足足打咗成廿六份稿，先敢向出版商sell吓，當然皇天不負有心人，最終就同「知出版有限公司」合作。

做政治家一定要忍

Libby原來大約每隔四個月就返香港探朋友，當中梗係包括以前嘅官場老友。問到從政經驗豐富嘅Libby點睇煲呔時，佢就大讚對方係叻仔，嗰時煲呔跟自己做財金局時，已經發現佢好醒目，仲有D姐俞宗怡，都同煲呔一樣跟過自己，當然兩個都係verygood。
咁煲呔話自己要做政治家，又有冇乜錦囊？Libby老實不客氣咁話，咁煲呔要跟佢學吓嘢，就係要「忍」而「退」。嘩，煲呔一向脾氣都唔好，咁真係篤中佢死穴咋喎。
Libby解釋做政治家最緊要梗係喜怒不形於色，就算個肚入面有乜唔滿意，都唔好爆出嚟，一定要忍，除非你係暴君啦。
點解？因為Libby同陳主教意見一致，認為權杖喺官員手上，市民既然係無權，官員就算畀人鬧吓都應該，唔能夠反而惡番人。
如果煲呔真係想再繼續做好啲，睇怕都要聽吓前輩教路至得。

傳真︰2623-9278
電郵︰[email protected]