JCShop老闆Alan話今次引入呢部機唔單止貪佢夠細,仲有埋內置微型喇叭,出得廳堂入得房,可以駁埋手提同家庭電玩PSP、PS3、XBOX360,拎埋出街玩都冇問題。LED燈膽可以用上兩萬個小時,每日用四、五個鐘都用足14年,只係賣2,680元。
小藍睇吓部機嘅規格,解像度未至於高清,但都有成640x480,大約有標清嘅質素。亮度係50流明,對比度200:1,講規格梗係唔及大機,但令人驚喜部機最大可以投影到50吋畫面,又支援16:9寬螢幕格式,睇戲打機一流。小藍即場試睇動畫《反斗奇兵》,效果都唔錯。
Alan話,部機針對年輕用家,但勢估唔到長輩都好like。全港擁有第一部M100,咪就係人稱阿姐嘅汪明荃囉。新婚燕爾嘅阿姐話,部機仔細細可以播到大畫面,匿埋間房播番同家英哥嘅結婚照正到痹。