董建華做定唔做？做好定唔做好？
經過一輪查找不足，發現做下去和劈炮都有各自表述的理由。
捱到2007，有頭有尾，半日都不能少，為自己爭啖氣，絕不向倒董勢力屈服。雖然揸住中指的是姓黃的議員，董特首未試過公開用中指表態，不過倒董幫經常頂撞，不留情面窒他，假使忽然引退，擺明是吃了眼前虧，唔夠man嘛。不過夾硬做下去，久不久便遭老胡罰企，當眾訓示，叫他查找不足，實在太落面，很難吞得下這口氣，隨時會谷到爆血管，傷身折壽，得不償失。

繼續做到2007，約滿後不再續約，劃上句號，叫做完成歷史任務，對國家、對家國，都算有交代。絕對不會被扣上歷史罪人的污名。但從今年到07，特區有乜冬瓜豆腐，中央不撐你，擦鞋商家不再挺你，三司十一局鬼打鬼跣你，甚至連維園阿伯都用粗話問候你。已經滿頭白髮的老祖父，嘗盡政途兇險，只有一條友孤身走埋那條單程路，何其落泊慘情。與時並進，不如返歸湊孫吧，今日兒孫仍聽你點，兩年後分分鐘駁嘴駁舌，曳曳過民主派。
雖然撐得苦，董特首一日頂住，曾蔭權就要做阿二，他的三胎施政大計難以出籠，胎死腹中，香港人口結構穩定，不會忽然爆炸急升，造成吃不消的災難。老董帶頭告老歸田，老化已成香港城市的landmark，十個人裏頭有一個是老餅，個個歸田的話，香港一定綠化得勁可愛。老董落台後就是普通一個老餅，任誰見了也不覺滯。