【新增回應】

前有線主播陳貝兒（Janis）驚爆同結婚6年嘅商人黃國棟離婚，有周刊上星期率先報道指，原來陳貝兒今年5、6月拍大台節目《嫁到這世界邊端》嘅時候，喺鏡頭前喊過好幾次，到有幕後啲同事忍唔住問發生乜嘢事，Janis先承認同老公分咗居，兼搞緊離婚。(新聞連結： http://bit.ly/2xMlTZ5 )

呢個節目喺本周一首播，吸引咗唔少觀眾睇，想知發生乜嘢事。

節目中，Janis分別會去德國、丹麥、阿聯酋同泰國，訪問異鄉人妻嘅故事。第1、2集Janis先去德國，一開始佢已經話：「呢個旅程好啱timing，因為我對愛好渴求，我以前有拍過拖，有鍾意過嘅人，但係乜嘢叫愛、乜嘢係真愛，我自己都未掌握到！」

Janis睇到卡菲為咗德國男友Markus，放棄香港嘅一切去當地結婚兼定居；又見到Markus話要幫老婆適應獨立生活，等佢可以享受喺德國嘅新生活，Janis已經有啲眼濕濕，對住卡菲話：「佢(Markus)真係好細心，擺你喺第一位，知道你唔開心，會行出嚟保護你，呢啲男人去邊度搵呀！」

之後Janis又有感而發謂：「聽人講話，婚姻行到尾，都係講感情，但原來唔係，原來入面都可以有好多愛情。我諗女人講到尾，都係希望可以有人錫。出面做嘢做得幾叻都好，返到屋企，落晒妝，開住個電視喺梳化，都係想隔籬有個人攬吓你，同你講，it's ok，出面做嘢做得幾辛苦，有我喺度。」語畢，Janis已經忍唔住哭。

第二集尾聲，Janis講番見到卡菲同Markus相處點滴、嗰種互信嘅關係，忍唔住話：「我好羨慕佢有一個愛佢嘅男人，喺佢望住卡菲嘅眼神好有愛，我都希望有個男人用呢種眼神望我！」結果兩個女人攬住喊咗！有網民睇完之後，留言為Janis打氣，希望佢早日走出離婚嘅陰霾，搵到一個愛佢嘅男人。

前晚Janis亦都有喺fb玩直播，解釋番喺節目點解會面腫腫：「節目出咗街之後，有好多俾支持同留言，好感動，令到我諗起好多嘢，真係唔意思。見到自己個樣好腫，因為行程好趕，一落機開始拍，冇時間休息！」

「本來我同導演傾過，想佢cut走啲喊位，我唔想變成怨婦俱樂部，希望大家返屋企好relax咁睇，但係導演話ok，因為嗰啲唔係全部都係係開心眼淚，係有戥人開心嘅眼淚，所以我信導演。」

Janis亦有講到喺呢段時間點樣調節自己嘅心情，佢話：「要接受自己係有唔開人心，想喊咪喊，迫自己笑係好辛苦嘅事，我會聽好多悲慘情歌，媽咪亦都陪咗我好耐，嗰陣我不停同佢講，但係o依家唔使擔心我！」

不過…網民有啲意見，就係…唔好再播《陪著你走》喇，《撒嬌》已經聽得夠多喇。

Janis變咗「喊包」，佢今日回覆傳媒時話：「o依家行到出街，同網民留言，大家都會話「陳貝兒我o依家見到你就想喊」，我聽到好開心，多謝大家睇得咁投入。希望大家慢慢見到我笑番，而唔係想喊。我好多時夜晚一個人，半夜三更唔係會有人可以陪我傾偈，有時想紓發吓自己情感，多謝網民陪住我度過寂寞嘅夜晚。」