當年今日
關於我們

李八方online︱林鄭月娥話飲鉛水係侮辱 國產疫苗搶住種 爭輸畀「太好人」陳肇始

蘋果日報 2021/02/03 00:34

林鄭鉛水麥美娟張堅庭

前人話「人到無求品自高」,今日我話「官到無求膽自大」。呢個「我」當然唔係八方,係林鄭月娥。5年前呢句金句,今時今日仍然喺立法會議事廳來回跌宕。
2015年10月16日,時任政務司司長、人稱「奶媽」專為當時特首梁振英拆彈嘅林鄭月娥,出席立法會有關用特權法調查鉛水事件,盡現「好打得」本色,話公務員落區飲鉛水係受辱,仲話下咗旨,以後任何官員面對同樣情況,「係不能接受屈辱」,謂要維護嘅唔止係個人樽鹽,仲有係特區政府樽鹽。
empty
年年考第一嘅林鄭,今次落後俾陳肇始,係第二個高官話會打國產疫苗。 資料圖片
奶媽變攬炒之母,5年後嘅今日,面對香港市民對國產疫苗嘅憂慮,林鄭噚晚用美帝嘅fb出post拍心口話:「只要有任何一款新冠肺炎疫苗在香港核准作緊急使用,我和團隊會第一時間接種。」
昔日話啲官飲鉛水係受侮辱,今日自己帶頭接種國產疫苗,對於飲咗7年鉛水嘅居民嚟講,呢啲先係侮辱。而不變嘅係,5年前,奶媽林鄭話食水含鉛事件被政治化;而家人哋問佢點睇市民對國產疫苗安已不,佢答:「如果你問我點樣說服香港人用內地疫苗,我會答,唔好涉及政治,要去政治化。」
其實林鄭自己可能都dum心,事關第一個搶住話去接種國產疫苗嘅唔係佢,而係曾經畀佢罰企42分鐘、「太好人」但唔掌握內容嘅食衞局局長陳肇始,噚日已搶閘代表一眾高官話:「帶頭打如果係畀到市民信心,我哋一定會咁做㗎。」陳姑娘呢劑真係膽自大。
empty
「嗰個女仔」講接種國產疫苗,稱願意以身作則。
建制派班啦啦隊當然跟機,投誠話願意接種國產疫苗,好似「嗰個女仔」工聯會麥美娟咁,話社會唔應該對國產疫苗有偏見,「唔應該將抗疫混合政治」,仲話自己願意「以身作則」先行接種;民建聯陳恒鑌就典型藍絲mode啦,「你唔信國產疫苗,可以唔打!」仲話不該「妖魔化」大陸疫苗,又建議畀市民接種疫苗後,可以免檢疫14日上大陸,增強市民接種疫苗誘因。嗯嗯…
同樣藍絲mode嘅當然唔少得西門梓敬,佢話,「嗰啲話唔打中國制(製)疫苗嘅小黃人,唔該掉晒屋企 Made in China 嘅產品先,跟住再掉埋自己,因為你自己都係 Made in China。」咁算唔算「鼓吹自殺」?
奇怪嘅係,民建聯主席李慧琼,無出過聲跟機喎,唔通「只驚黨」…?
empty
袁國勇教授曾經話,即使有國家聲稱成功研發疫苗,佢都會待疫苗推出市場後1年才接種,以觀察疫苗有否副作用。資料圖片
唔止咁,西門梓敬仲拎港大微生物學系講座教授袁國勇出嚟binC引戰,事關袁教授今年5月曾經講過,「寧戴口罩、不打疫苗」。教授話,疫苗必須要有效且必須安全,所以即使有新疫苗出現,佢都會睇定啲先、等到疫苗接種一年後,睇吓有咩副作用。西門梓敬就拎呢句「寧戴口罩、不打疫苗」,呼籲大家留4字詞畀教授。
講到金句,點止袁教授呢句,導演張堅庭有句仲精警,可能林鄭都係喺導演呢句金句得到啟發。張堅庭話:
「讓政府高官先行打疫苗,如果佢哋安全,即疫苗安全;
如果佢哋死咗,咁香港就安全。」
不過,林鄭都未必睇到導演9月呢個post,因為張堅庭畀小粉紅狙擊,一早刪咗post。
empty
張堅庭刪po並貼出原圖,指該段說話並非自己原創,而係翻譯外國笑話。 facebook圖片
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁