當年今日
關於我們

【和理非真諦】向球場暴力說不 多蒙德盃過關

蘋果日報 2017/02/09 08:27

多蒙特德甲球場暴力

當香港核心價值逐漸崩壞,近乎無險可守嘅關頭,唔少香港人認為抗爭別無他途,和理非仲難聽過粗口。其實和理非與否最緊要明辨是非、因時制宜,多蒙特球迷喺周三德盃16強就作出示範,高舉橫額同標語向上個禮拜襲擊RB萊比錫粉絲嘅極端球迷說不,並向傷者道歉,團結一致高呼「球場事,球場了」,結果球隊亦表現爭氣,同哈化柏林激戰120分鐘踢成1:1,最終互射12碼贏3:2晉級八強。
紅牛集團透過走法律罅嚟掌控萊比錫,加上其暴發戶作風被視為顛覆德甲以球迷為先嘅聯賽生態,令其他球隊唔少球迷組織都會喺對萊比錫期間示威表達不滿,但事件去到上周六進一步升級──喺多蒙特對萊比錫嘅德甲賽前,有幾百名多蒙特ultras賽前去到客隊球迷下塌酒店外施襲,造成最少10名球迷受傷送院。兩軍事後均嚴厲譴責鬧事球迷,呼籲作出嚴懲,而多蒙特嗰場亦以1:0擊敗萊比錫,證明公平競爭先會令大家心悅誠服。嚟到呢場,「蜜蜂兵團」同哈化亦公平較技,最終哈化五球12碼有三球射失,總比數輸3:4出局。