鄭少秋今日喺太古為月底舉行《鄭少秋半世紀·大時代世界巡迴演唱會－澳門站》進行綵排，秋官狀態非常弗，一口氣跳八分幾鐘舞仍冇喘氣，兼且腰力十足不停扭動。秋官指男人扭得唔好會變得太女性，所以一定要扭得有力，今次大概跳十隻舞，而並非首首都跳勁舞，有些係擺型格舞姿。

以往有進食冬蟲草強身，近年轉食人參補氣，問到有冇進補食鞭？秋官笑住話：「我咪係鞭，人鞭，又高又瘦，咁梗係粗鞭，不過唔好諗其他，長型嘅嘢都叫鞭，頭髮都鞭。」之前香港站有唔少觀眾買唔到飛，今次會整個舞台搬過澳門，嘉賓就邀請側田。

講到欣宜自組公司，秋官指女兒事前有同佢商量，呢件事都早有計劃，佢話：「細路有自己理想發揮係好，佢想製作路線有主動權，我知佢係開公司跟蕭定一合作。」對於陳秋霞癌病治療康復中，秋官未知情，但對於曾合作過的廖麗麗過身感可惜，秋官讚對方親切有禮，又分享過食齋未必好，要均勻飲食才能身體健康心得。