雖然英格蘭上場外圍賽主場以1:0贏斯洛文尼亞，成功出線世界盃決賽周，但三獅軍團嘅球員同領隊，感覺就唔多好受啦。因為嗰場波，主場球迷噓球員、又放紙飛機，仲有一班球迷未完場就提早離場，完全唔替英軍出線世盃決賽周而高興。為此英格蘭國家隊領隊修夫基就維護自己球隊，認為歷史上英軍表現長年以來都令球迷失望，但自己既球隊唔應該為此孭鑊受氣，仲話球迷支持好重要，球隊正正需要成長嘅空間。

佢強調每一個代表三獅軍團既球員都係全心全力為國家隊付出，希望未來大打進攻足球，以一場場嘅贏波嚟說服一班不滿嘅球迷。入咗世界盃決賽周都仲咁不滿，英軍球迷叫一班阿根廷、意大利國家隊嘅粉絲情何以堪呢？