黎明自從去年大除夕晚喺北京開演唱會後，近呢兩個月除咗忙於同新歡樂基兒日夜黐埋一嚿之外，工作近乎停頓。好多人以為佢家陣拍拖大過天、無心戀戰，但原來佢已經密謀下月出動，以公益金董事身份，為下月三十號喺紅館舉行嘅「莎莎愛心情獻雷頌德公益金音樂會」擔任謀臣兼表演嘉賓。

岳少讓路

黎明自知𠵱家出席任何場合，佢同樂基兒之間嘅話題必定成為焦點，所以對需要曝光嘅工作更加嚴格挑選，而唯一打動到佢嘅，就係慈善活動。今次公益金搞慈善騷，係想帶出港人互助嘅主題，聽聞黎明一口答應演出之餘，重親自邀約群星做嘉賓，到時除咗有佢之外，其餘演出嘉賓仲包括陳慧琳、李克勤、譚詠麟、古巨基、楊千嬅、許志安、盧巧音、何韻詩同梁漢文九位咁多。
呢次音樂會檔期本來係屬於東亞娛樂嘅，老闆林建岳知道公益金想搞慈善騷，即時讓出檔期，成人之美；至於黎明亦都真係出力幫手，不過唔知嗰晚佢會唔會請樂基兒做座上客、等女友喺台下為佢打吓氣吖喇？