噚日唔少泛民主派議員都大吐苦水,一向惹火嘅劉慧卿話,二十年前去《城市論壇》邊使坐裝甲車走人?邊會有人掟石頭、吐口水同追打?李華明近期喺節目講豬肉、鰻魚等食品安全,都俾人鬧佢係豬係走狗。自認熱血中年嘅李卓人講最低工資,就俾維園阿伯鬧會趕走老闆,嫻姐(陳婉嫻)講佢哋就拍手叫好。班議員講講吓,重㷫過維園阿伯,慣咗同卿姐鬥嘴嘅曾鈺成都唔執輸,自爆多年前出席港台《政黨論壇》,一樣俾卿姐fans狂噓,臨走重俾人圍!
主持呢個節目超過十年嘅韋基舜就話,節目主持冇做好本份,故意迫咁啲人處於下風,冇持平地反映各方立場引致;佢老馬有火,不斷同謝志峰、吳明林、毛孟靜爭論,毛孟靜就好唔服氣咁話,主持人如果連細路仔俾人斬呢類話題都要懶持平,就真係好多餘。韋基舜冇你咁好氣,話總之各有各做法,唔關佢事。