【李八方online】不滿娥特批評吳秋北 工聯元老組「擁北者」聲援
山竹
【新增影片】
工聯會會長吳秋北早前批評法官係「青年殺手、社會罪人、專業失德」,上周二遭娥特不點名遺憾後,約10名自稱來自「擁北個人小組」嘅「擁北者」,今朝現身特首辦示威區,掛上「不滿行政長官對港獨只識遺憾,對愛國者就強烈譴責」嘅橫額,以及高舉寫有「要求與中央保持一致,對港獨0容忍!」、「保護陳浩天,斥責吳秋北,公道嗎?」、「對港獨心慈手軟,對建制者嚴詞譴責」標語,話要向娥特抗議,其間叫咗幾句「反中亂港獲姑息,愛國愛港受打擊」口號,但就拒絕接受傳媒訪問,只派咗幾名代表入特首辦,準備向娥特遞信。
睇返資料,其實呢班「擁北者」嘅橫額同標語內容,連基本事實都搞錯,娥特上周二只係不點名「遺憾」咗吳秋北,反而對陳浩天早前演講就嚴詞譴責。八方現場所見,呢班以長者為主,由工聯會前副會長梁富華成立嘅「擁北者」,一入到特首辦,連口號都唔見嗌一句,即使畀同場示威者當面力斥係「政棍」,鬧佢哋:「日日喺度話人反中亂港,你哋係香港老千嚟架!係禍港啊!係禍國䄃民啊!」,梁富華同一班「擁北者」仍然默不作聲。
娥特去到示威區時,梁富華等人卻主動同娥特握手,娥特無親自接信,只由助手代接。呢班「擁北者」話要聲援吳秋北,卻「聲援」得如此沉默,唔知會否考慮改名叫「沉默之聲」?
自稱來自「擁北個人小組」嘅「擁北者」,今朝現身特首辦示威區。許頌明攝
工聯會會長吳秋北早前批評法官係「青年殺手、社會罪人、專業失德」。