韓國女團TWICE嘅台灣成員周子瑜噚日19歲生日，有唔少粉絲以佢嘅名義捐款，或喺地鐵站買廣告牌為偶像慶生。子瑜噚日晏晝於V app搞直播同粉絲慶生，蛋糕上插上「20」字眼嘅蠟燭(韓國計虛齡)，與粉絲、工作人員、隊友彩瑛一齊唱生日歌。

直播中，子瑜透露前一晚自己好早休息，以為成員會喺隔日先幫佢慶生，點知踏正12點成員就拎住蛋糕送驚喜。而子瑜噚晚喺Instagram以韓文、中字留言，並上載多張相感謝粉絲：「很開心今年生日也收到了好多祝福，也看到了來自各地once(TWICE粉絲名稱)們的愛心，謝謝你們傳播這些正面的事，讓今天變得更有意義。」子瑜又指出道後雖然會有好多困難，但亦令佢學到好多嘢，令佢越大越清楚自己想要咩，並期許今年自己會做得更加好。

更多韓流，喺晒《娛果》
http://fb.com/appledailyent