網壇一姐姬芭戰績麻麻，而佢周日就宣佈，自己因為左腳筋有傷而退出伯明翰網球經典賽，呢位29歲德國女將更有機會缺席下月展開嘅溫布頓網賽！

姬芭透露自己喺上月嘅馬德里網賽第三圈拉傷左腳筋，而自己喺上周六練波時舊患復發，為免令傷勢惡化，佢就決定要唞唞先。至於今個月25日舉行嘅伊斯特本網賽，姬芭亦未決定會唔會打。