金融海嘯陰霾不散，各行各業喊晒口，縮皮裁員消息此起彼落。咁嘅環境，搞到銀行閂水喉有錢唔願借，咪話中小企借錢難，打工仔想搵銀行造按揭買樓，一樣唔容易，實際按息分分鐘要4厘以上。
華華聽班按揭轉介公司高層講，家陣銀行對「食佣一族」（即係收入主要嚟自佣金嘅打工仔）嘅按揭審批，特別嚴謹，同有穩定月薪嘅打工仔相比，實際按息至少差兩厘！
噚日華華出席一間按揭轉介公司記招，公司高層同華華講，家吓打工仔問銀行借錢買樓冇以前咁順利，尤其係靠食佣為生嘅，直頭俾銀行列入高危借錢人士，佢哋嘅按揭息率，比起優質客戶（例如有穩定收入嘅公務員同老師等），相差至少兩厘，晚吓手隨時要「P+」（P即最優惠利率）㖭。
呢批食佣一族主要有「黑三類」，分別係金融、保險同地產嘅經紀。事關時勢唔好，樓股齊冧，市民勒緊褲頭唔願使錢，投資、買保險同置業樣樣都拖住先，搞到從事呢三行靠佣金收入嘅經紀，首當其衝，收入唔穩定，自然俾銀行收緊按揭審批。唉，以前嘅收入尖子，一場金融海嘯冚埋嚟，即時淪為「黑三類」，都咪話唔欷歔。