蔡立兒同歐陽德勛今日去到牛頭角接受小金子主持嘅清談節目《喜樂婆婆會客室》訪問，小金子邀請同樣係基督徒嘅弟兄姊妹接受訪問，仲話節目唔限集數，主要係同藝人分享人生中嘅艱難與喜樂。

問到蔡立兒點樣從艱難中得到喜樂？佢話：「自己相隔20幾年，仲可以重返樂壇，已經係奇蹟，自己都冇諗過，o依家同以前比(較)已經好唔同，我要重新學習樂壇嘅運作模式。嚟緊我會出單曲，仲係黑膠碟。」

至於提到好友梁漢文（Edmond）將再就醉駕案上庭，蔡立兒話：「我哋一直有為佢祈禱，我同佢有聯絡，暫時知嘅情況同大家差唔多。」而歐陽德勛就話：「Edmond嘅生活同工作都繼續，佢上咗好寶貴嘅一課。」問到會唔會勸佢飲少啲酒？佢就話：「得㗎嘞，佢大個仔，知道下一步應該點做，佢應該醒覺。」另外，問佢哋有冇關心師兄劉浩龍同容祖兒分手嘅新聞？佢哋就話關心師兄嘅音樂會多啲，仲話：「深信佢血入面流住音樂嘅血，希望佢拍戲之餘都可以做好音樂。」

精選娛聞，喺晒《娛果》
http://fb.com/appledailyent