早排馮仁昭都講過盧海鵬、林建明、賈思樂、戚美珍12月喺九龍灣國際展貿中心做嗰個《蝦仔爹哋音樂舞台劇II》搵咗金剛做「蝦毛仔」，仲有好多猛人好似吳君如、陳慧琳、曾志偉、梁家輝等輪流串演啲角色，馮仁昭又收到風，我哋嘅歌神張學友都技癢，會加入演其中一場，畀觀眾一個驚喜。

羅美薇賀契媽

今次《蝦仔爹哋II》講鵬哥患咗失憶症，聽落已經好好笑，鵬哥失咗憶爆肚咪仲冇譜？隨時盧海鵬試咪，笑死人冇命賠。失憶嘅鵬哥要睇醫生，所以吳啟華、君如同志偉就輪流演醫生，劇入面仲有戚美珍嘅舊情人出現，除咗梁家輝、黃日華、陳百祥輪住做，最搞鬼連老公苗僑偉都扮佢舊情人，至於學友，就會同林峯、陳慧琳、草蜢扮番自己，喺其中一幕戲講卡拉OK場景裏面，學友會突然喺個超立體電視度走出嚟，咪好似貞子咁囉？
另外，前晚Halloween係鄧光榮遺孀Janet嘅生日，兩個女同班朋友幫佢搞飯局慶祝，學友太太羅美薇係鄧光榮嘅契女，學友同羅美薇、李琳琳同姜大偉都有出席，學友仲代表眾人送咗部電腦畀鄧太㖭。