隔牆有耳:2014想有抗狼英爭普選物品傍身
今日遊行要血拼 - 李八方
隔牆有耳
天文台預計今日陽光普照,氣溫介乎13至18℃,涼涼哋最適合遊行。民陣同真普聯今日發起嘅元旦遊行,3點喺維園出發,八方提提大家可以早少少到,先去維園音樂亭和平佔中攤位就政改原則投票,之後可以邊行邊血拼,去各政黨、民間團體嘅街站掃定抗狼英爭普選等物品傍身,T-Shirt、布袋、紙製路姆西一應俱全。
元旦遊行,點少得2013年一丟成名嘅路姆西?民主黨繼上次禍港聯盟「呃人man」系列,今次整咗巨型路姆西紙模型畀大家任影唔嬲,仲會派5,000個小型路姆西畀遊行人士,民主黨創意媒體部部長黎敬瑋話路姆西已經成為抗爭icon,反映市民對特首梁振英嘅不滿。
到咗公民黨街站,就有$68.9一套嘅文具套裝,包括「普選近在紙尺」、「擦膠官擦膠」同「有得揀顏色筆」,限量200套,學生哥集齊一套,公民教育科一定攞高分啦。至於和平佔中就有環保袋賣100蚊一個,仲有黑白兩色T-Shirt賣120蚊一件,同樣數量有限,有買趁手。
回顧2013年,港視風雲都算經典,一班不滿政府黑箱作業發牌嘅人士組成「留守香港」,佢哋今日會借用人民力量攤位賣新書《政總留守抗爭日記》同埋「留守香港」T-Shirt,兩樣買齊都只係$120,收入會撥作組織日後行動嘅基金,攤位仲設有攝錄機,市民行過可以講兩句遊行心聲同訴求,佢哋會製成影片,交畀目標議員同官員。
mailto:
[email protected]有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange